شروط الاستخدام

الاتفاق ده بين مين ومين

بين كشكول، والمدرس اللي فتح الحساب (صاحب الحساب). المساعدين اللي المدرس بيضيفهم، وأولياء الأمور والطلاب، بيستخدموا كشكول من خلال حساب المدرس.

لما بتعلّم على «موافق» في التسجيل أو في رابط إعداد حسابك، بتوافق على الشروط دي وعلى سياسة الخصوصية. بنسجّل إمتى وافقت وعلى أنهي نسخة.

حسابك

• إنت اللي بتختار الباسورد والرقم السري بتوعك، ومحدّش في كشكول يعرفهم. خليهم سرّ.
• إنت مسؤول عن اللي بيعمله المساعدين اللي ضفتهم، حسب الصلاحيات اللي اديتها لهم.
• الحساب ده حسابك إنت؛ متبيعهوش ومتشاركهوش مع مدرس تاني.

الباقات والأسعار

كل الباقات فيها نفس المميزات؛ الفرق في المدة بس، والمدة بتتحسب من يوم الاشتراك:

• الباقة شهري: 699 ج.م — شهر من يوم الاشتراك.
• الباقة ترم: 2,599 ج.م — 4 شهور من يوم الاشتراك.
• الباقة سنة كاملة: 7,499 ج.م — 12 شهر من يوم الاشتراك.
• متابعة أولياء الأمور والطلاب: 150 ج.م / شهر.
• واتساب بيتبعت لوحده: 200 ج.م / شهر.
• رسايل زيادة: 30 ج.م لكل 100 رسالة.
• الملازم: 50 ج.م / شهر.
• لينكات تعليمية: 50 ج.م / شهر.
• بنك الأسئلة: 500 ج.م لكل 10 امتحانات.

رسايل واتساب الإضافية بتتباع باكدجات، كل باكدج 100 رسالة. الأسعار بالجنيه المصري. لو غيّرنا سعر، التغيير بيبدأ من التجديد اللي بعده، مش في نص مدة إنت دافعها.

الدفع والتجديد

• بتدفع بإنستاباي أو فودافون كاش أو كاش أو تحويل بنكي. المدة بتبدأ لما نأكّد إن الفلوس وصلت.
• لو جدّدت بدري، المدة الجديدة بتبدأ بعد ما القديمة تخلص، فمش بتخسر ولا يوم.
• لو المدة خلصت ومجدّدتش، بتاخد 7 أيام سماح والبرنامج شغّال عادي. بعدها ممكن الحساب يتقفل لحد ما تجدّد — بياناتك بتفضل محفوظة زي ما هي.
• الإضافات (زي متابعة أولياء الأمور) بتمشي مع باقتك وبتخلص معاها.

الإيقاف المؤقت

• تقدر توقّف حسابك بنفسك من جوّه البرنامج، من غير ما تستأذن حد.
• لو وقّفت في نص مدة مدفوعة، المدة دي بتكمّل لآخرها والإيقاف بيبدأ بعدها.
• وإنت موقّف محدّش بيحاسبك ولا بيطالبك بحاجة، وترجع وقت ما تحب وتلاقي شغلك زي ما سبته.

الاسترداد

• المدة أو الإضافة اللي بدأت مبترجعش فلوس الأيام اللي فاضلة منها.
• لو دفعت مرتين أو اتسجّلت دفعة بالغلط، بنرجّعها لك أو بنحسبها من التجديد الجاي — زي ما تحب.
• لو كشكول وقف عندك بسببنا إحنا لمدة طويلة، بنزوّد مدتك بعدد الأيام اللي ضاعت.

لو حبّيت تمشي

• تقدر تبطّل تجدّد في أي وقت؛ مفيش عقد بيلزمك بمدة.
• تقدر تطلب نسخة من بياناتك قبل ما تمشي.
• لو طلبت تقفل الحساب نهائيًا، بنمسح طلابك وأولياء أمورهم وحساباتك ورسايلك مرة واحدة، والمسح ده مبيرجعش. سجل اللي دفعته لكشكول بيفضل في دفاتر الشركة طول المدة اللي قانون الضرايب بيطلبها.

بيانات طلابك

بيانات طلابك ملكك. إحنا بنشيلها ونعرضها لك بالنيابة عنك بس، زي ما سياسة الخصوصية بتشرح.

إنت بتأكّد إن من حقك تسجّل البيانات اللي بتسجّلها، وإنك بتبلّغ أولياء الأمور إنك بتستخدم كشكول.

الاستخدام المسموح

• متستخدمش كشكول في حاجة مخالفة للقانون، ولا لإزعاج أو إهانة حد.
• متحاولش تدخل على حساب غير حسابك، ولا تعطّل البرنامج أو تختبر حمايته من غير إذن.
• رسايل واتساب اللي بتبعتها من رقمك بتبقى مسؤوليتك، وبتمشي حسب شروط Meta.

الخدمة ومسؤوليتنا

• بنشتغل علشان كشكول يفضل شغّال طول الوقت، وبنعمل صيانة في أوقات هادية على قد ما نقدر.
• بنحسّن البرنامج باستمرار؛ أي ميزة جديدة بتوصلك مقفولة لحد ما تتفتح لحسابك.
• على قد ما القانون المصري يسمح، مسؤوليتنا عن أي ضرر محدودة بالمبلغ اللي دفعته لكشكول في آخر تلات شهور.

لو غيّرنا الشروط

هنبلّغك جوّه كشكول قبل ما التغيير يبدأ. لو التغيير مهم هنطلب موافقتك تاني، ومش هنعتبر سكوتك موافقة. القانون المصري هو اللي بيحكم الاتفاق ده، ومحاكم القاهرة هي المختصّة.

إزاي تكلّمنا

• المدرسين والمساعدين: من صفحة «مساعدة» جوّه كشكول.
• أي حد تاني: من «لا تستطيع الدخول؟ تواصل معنا» تحت صفحة الدخول.